KATHOK NYAPRET AGAWE MUMET

“Wah..kok sajak nglangut ana apa ta lik Dhadhap.” Klendor takon karo pak lik e sing lagi lungguh nglangut ana ing warung kopi.

“Lagi mikir ponakanmu kae lho, kandhan-kandhanane angel saiki.” Lik Dhahap ndhingkluk sinambi kukur-kukur

“Lha bab apa ta lik?”

“Kui lho, saiki si Kanthil senengane nganggo kathok nyapret, gek pupune diumbar rana-rana.”

“lha yen neng omah wae lak ya ora apa apa ta lik.”

“Neng omah piye Ndor, wong lunga dolan ya nganggo kathok nyapret, kaos singset, pating prethethet. Apa ora marai isin.” Lik Dhadhap karo gedhak-gedhek.

“O..., di umbar to lik? Lha jaman saiki ya kui sing lagi tren lik. Aja kaget.”

“Kamangka jaman ndhisik kuwi wong wadon nganggo kathok dawa wae dianggep ra pantes, ora ilok. Trus gandheng ana sing tetep nganggo, yo akhire dadi lumrah. Jaman saya maju, kathok dawa kanggo wong wadon dadi lumrah, nganggo gojak-gajek dadi bab sing marai isin kanggo wong wadon. Jaman sangsaya maju maneh, gojak-gajek dadi bab sing lumrah, nganggo kathok nyapret marai ngisin-isini. Lha saiki kathok nyapret sangsaya lumrah, sing ngisin-isini yen nganggo kathok cawet thok. Apa mbesuk bakal kelakon ya Ndor kathokan cawet dadi bab sing lumrah kanggone wong wadon lunga wira-wiri?” Lik Dhadhap karo ngulati langit

“Aku kok yo kuwatir yo lik, aja-aja jamane anakku mbesuk, cawetan thok dadi bab sing lumrah. Budaya ketimuran dadi ilang, sithik mbaka sithik ora krasa.” Klendor melu nggagas.

“Lha iya ta Ndor, mbok aku diewangi ngandhani adhimu kae, ben ora kebablasen anggone nyandhang menganggo. Cangkemku wis juweh ngandhani.”

“Yo lik, tak cobane. Menawa isih kena dikandhani si Kanthil kuwi. Ben ora kegawa gaya urip sing ora bener. Mosok pupu di gratisne, kamangka pupu pitik wae ana ajine. Paling ora ya patang ewu. Yen urip mung seneng anut grubyuk, tanpa nganggo petung, tanpa nganggo mikir suwe ning suwe bocah wadon dadi barang kanggo dolanan. Di anggep murah merga diobral awake. Muga-muga wae kabeh ndang padha sadar kabeh.”

“Iya, muga-muga ya Ndor. Ngene wae mesthi isih ana sing ora sarujuk karo penemune awake dhewe.”

“Ya ora apa-apa, wong kuwi nduwe penemu dhewe-dhewe. Sing penting ora nerak wewalere para sepuh, ora nerak wewalere Gusti.”

Gambar : http://www.kawankumagz.com