''Wah..tipine gayeng yo gong?" Gareng nyruput susu jahe ing warung langganane."Gayeng kepiye kang?"
"Apa kowe ra nonton wingi. Ana pernikahan mewah sing ngentekake ragat milyaran, kamangka awake dhewe wae arep golek duit kanggo mbayar SPP wae paribasan niba tangi ra entuk-entuk. Stasiun sejene nyiarake pesta rakyat sing ragate yo ora sethithik. Panganan akeh tur ora mbayar. Mendah kaya ngapa senenge yen pesta kui mau di enekake neng sinabung. Para korban gunung mbledhos sing padha kelien kae." Gareng rumangsa prihatin.
"Mbok ya wis kang, rasah nggresula, lha wong dhuwit-dhuwite dhewe, ragat-ragate dhewe, lha kok kowe iyik."
"Ya pancen dhuwite dhewe, ning mbok ya mikir wong mlarat kaya awake dhewe iki yen nonton pra ya ngiler."
"Gampang wae kang, ora sah nonton lak beres."
"Jane ya ngono, ning yen tak pikir-pikir pancen yo lucu kok, jare negarane awake dhewe ki negara sing mlarat kakean utang, ewadene kok yo isih ono sing kuat ngragati mangan-mangan sing kaya ngono kui. Aja-aja urun ragat kui dudu wong Indonesia Gong?"
"Aku ora ngerti kang, sing ngragati piyayi ngendi, sing tak weruhi negarane awake dhewe kui kejajah kang." Bagong nerangake penemune.
"Kejajah piye le?" Gareng ora mudheng karepe Bagong.
"Kejajah morale, kejajah budayane, kejajah ekonomine. Tuladhane ya sing kaya tipi kui. Pancen ora salah wong pancen kuat ragat, nanging aja nganti seneng-seneng kuwi mau ndadeake iri warga liyane, basa pintere kecemburuan sosial. Aja nganti ana penemu mulyaning manungsa kuwi gumantung bandha. Semono uga stasiun tipi mbok ya gawe hiburan kui ora mung nyenengke nanging uga menehi tuladha sing becik. Muga-muga para kang kawogan ngrasaake apa sing dadi grundele dhewe iki yo kang?"
"Yo gong, muga-muga wae. Awake dhewe kui drajate wong cilik, lungguhe dhingklik, mangane sethithik, mung iso ngudarasa kareben kabeh dadi becik. Muga-muga kabeh di paringi ganpang gangsar anggone golek sandang pangan."
Gambar : http://www.life.viva.co.id
0 komentar:
Posting Komentar