Bismillah

Yen urip kui linambaran bismillah, bakal ayem tentrem urip bebrayan ing masyarakat. Iki dudu tepsir bismillah. Iki mung othak athik gathuk. Menawa ora mathuk aja banjur nuthuk.

Sepisan bismillah yaiku bisa milah.

Tegese wong kan urip bebarengan ing bebrayan agung kui kudu bisa milah ing antarane becik lan ala. Amarga ing alam bebrayan ora saben menungsa kui tumindak apik utawa bener. Mesthi ana kang seneng nerak wewaler. Manungsa di paringi nalar karo Gusti Allah kudu bisa kanggo milah endi sing bener lan endi sing luput.

Kang angka loro yaiku Bisa Milih

Akeh manungsa kang bisa mbedaake, kang bisa milah nanging ora wenang milih. Tuladhane wong kang drajate babu, utawa batur. Bisa mbedaake luput lan bener nanging kudu nindakake apa karepe bendarane. Mula saka kui dadi menungsa kudu bisa merdika babakan milih. Tegese yen wis bisa milah sing bener ya enggala dipilih lan ditindakake ing sabendinane.

Kang angka telu yaiku Bisa Molah-Malih

Tegese empan papan. Mangerteni kapan wayah geguyonan kapan wayah nyambut gawe. Bisa mapanake diri jumbuh karo wayah lan panggonan. Ora ateges tumindak munafik ananging bisa njaga pribadi saka tumindak kang bisa ndadeake crah, ndadeake bubrah alam bebrayan. Kudu bisa ngemong wong kang lagi padudan kang tundhane bisa ndadeake tentrem akure wong kuwi mau.

Kang Pungkasan yaiku Bisa Mulih

Tegese milah, milih, molah-malih mau kudu diulihake marang Gusti Allah. Ora kena kita milah, milih, molah-malih  ananging nerak wewalering Gusti Allah. Kabeh tindak-tanduk solah bawa kudu diulihake marang ngendikane Gusti Allah kang awujud pustaka suci. Yen kabeh mau bisa diugemi bakal waluya urip kita, ayem tentrem kang tundhane dipungkasi kanthi khusnul khatimah.

Gambar : http://m.photo.abatasa.com